ನಿಮ್ಮ ಶ್ರೀಮಂತಿಕೆಗೆ ನೀವೇ ಶಿಲ್ಪಿ

ಈ ಪುಸ್ತಕಕ್ಕೆ ತಳಹದಿಯಾಗಿರುವುದು ಪ್ರಾಯೋಗಿಕ ಅಥವಾ ವ್ಯಾವಹಾರಿಕ ಸಿದ್ಧಾಂತವೇ ವಿನಾ, ತತ್ತ್ವಶಾಸ್ತ್ರವಲ್ಲ. ಹೀಗಾಗಿ ಇದೊಂದು ಕಾರ್ಯೋಪಯೋಗಿ ಕೈಪಿಡಿಯೇ ವಿನಾ ಸಿದ್ಧಾಂತಗಳ ಕುರಿತಾದ ಪ್ರಕರಣಗ್ರಂಥವಲ್ಲ. ‘ಹಣ’ ಎಂಬುದೇ ‘ತುರ್ತು ಅಗತ್ಯವಾಗಿ’ ಪರಿಣಮಿಸಿರುವವರನ್ನು, ಮೊದಲು ಶ್ರೀಮಂತಿಕೆ ಪಡೆದು ತರುವಾಯದಲ್ಲಿ ತಾತ್ತ್ವಿಕ ಚಿಂತನೆಗಳೆಡೆಗೆ ಹೊರಳಲು ಬಯಸುವಂಥವರನ್ನು ಉದ್ದೇಶವಾಗಿಟ್ಟುಕೊಂಡು ಕಟ್ಟಿಕೊಟ್ಟಿರುವ ಕೃತಿಯಿದು. ತತ್ತ್ವಮೀಮಾಂಸೆಯ ಆಳ ಅಧ್ಯಯನಕ್ಕೆ ಸಮಯ – ಸಂಪನ್ಮೂಲ- ಅವಕಾಶವನ್ನು ಇದುವರೆಗೂ ಕಂಡುಕೊಂಡಿರದಿದ್ದರೂ ಫಲಿತಾಂಶವನ್ನು ಬಯಸುವ ಮತ್ತು ತಾವು ಕೈಗೊಳ್ಳುವ ಕ್ರಮಕ್ಕೆ ಒಂದು ಕ್ರಮಬದ್ಧ ಶಾಸ್ತ್ರ ಅಥವಾ ವಿಜ್ಞಾನದ ತೀರ್ಮಾನವನ್ನು (ಆ ತೀರ್ಮಾನಕ್ಕೆ ಕಾರಣವಾದ ಎಲ್ಲ ಪ್ರಕ್ರಿಯೆಗಳ ಆಳಕ್ಕಿಳಿಯದೆ) ಆಧಾರವಾಗಿಟ್ಟುಕೊಳ್ಳಲು ದೃಢಸಂಕಲ್ಪ ಮಾಡು ವಂಥವರಿಗೆ ಮೀಸಲಾದ ಕೃತಿಯಿದು.
ಆದ್ದರಿಂದ, ಮಾರ್ಕೋನಿ, ಥಾಮಸ್ ಆಲ್ವಾ ಎಡಿಸನ್ರಂಥ ಪ್ರತಿಭಾವಂತ ವಿಜ್ಞಾನಿಗಳು ಪ್ರತಿಪಾದಿಸಿದ ವಿದ್ಯುಚ್ಛಕ್ತಿಯ ಕಾರ್ಯಾಚರಣಾ ನಿಯಮ ಸಂಬಂಧಿತ ವ್ಯಾಖ್ಯೆಗಳನ್ನು ಸ್ವೀಕರಿಸುವಂತೆಯೇ, ಈ ಕೃತಿಯಲ್ಲಿನ ಮೂಲಭೂತ ತತ್ತ್ವ ಅಥವಾ ನಿಯಮಗಳನ್ನು ಓದುಗರು ನಿಸ್ಸಂದಿಗ್ಧವಾಗಿ ಸ್ವೀಕರಿಸುತ್ತಾರೆ, ನಂಬುತ್ತಾರೆ ಮತ್ತು ಯಾವುದೇ ಭಯ, ಹಿಂಜರಿಕೆಯಿಲ್ಲದೆ ಅವನ್ನು ಕಾರ್ಯರೂಪಕ್ಕೆ ತಂದು ಅವುಗಳ ಹಿಂದಡಗಿರುವ ಸತ್ಯವನ್ನು ಸಾಬೀತುಮಾಡುತ್ತಾರೆ ಎಂಬುದು ಸಹಜ ನಿರೀಕ್ಷೆ. ಇಂಥ ಹೆಜ್ಜೆಯಿರಿಸುವ ಪ್ರತಿಯೊಬ್ಬರೂ ಶ್ರೀಮಂತರಾಗುವುದು ಖಂಡಿತ; ಕಾರಣ, ಇಲ್ಲಿ ಅನ್ವಯಿಸಲಾಗಿರುವ ವಿಜ್ಞಾನ ಒಂದು ಕರಾರುವಾಕ್ಕಾದ ವಿಜ್ಞಾನವಾಗಿದ್ದು, ಇಲ್ಲಿ ವೈಫಲ್ಯಕ್ಕೆ ಅವಕಾಶವೇ ಇಲ್ಲ.