ಅಕ್ಷರ ಜೋಡಣೆ, ಪುಸ್ತಕ ವಿನ್ಯಾಸಗಳಲ್ಲೇ ತೊಡಗಿ ಹಲವಾರು ವರ್ಷಗಳೇ ಕಳೆದು ಹೋಗಿವೆ. ನಾವು ವಿನ್ಯಾಸಗೊಳಿಸಿದ ಪುಸ್ತಕಗಳನ್ನು ಕಂಡಾಗಲೆಲ್ಲ ಒಂದು ತೆರನ ಖುಷಿ. ಪುಸ್ತಕಗಳನ್ನು ಕಂಡಾಗ ಅವುಗಳ ವಿನ್ಯಾಸಗಳನ್ನು ಪರಿಶೀಲಿಸುವುದು ಅಭ್ಯಾಸ. ಹೊಸ ಹೊಸ ವಿನ್ಯಾಸಗಳ ಪುಸ್ತಕಗಳನ್ನು ನೋಡಿದಾಗ ಸಂತೋಷವಾಗುತ್ತದೆ. ನೋಡಿದ ಪುಸ್ತಕಗಳನ್ನು ನೆನಪಿನಲ್ಲಿಟ್ಟುಕೊಂಡು ವಿಶಿಷ್ಟವಾದ ಪುಸ್ತಕಗಳನ್ನು ರೂಪಿಸುವುದು ಹಾಗೂ ಅವುಗಳು ಇನ್ನಷ್ಟು ಸುಂದರವಾಗುವಂತೆ ಮಾಡಬೇಕೆಂಬ ಕಾಳಜಿಯನ್ನು ಪ್ರೀತಿಯಿಂದ ಮಾಡುತ್ತ ಬಂದಿದ್ದೇವೆ. ಹಲವಾರು ಪುಟಗಳ ಪುಸ್ತಕಗಳನ್ನು ಕಡಿಮೆ ಅವಧಿಯಲ್ಲಿ ರೂಪಿಸಬೇಕಾದ ಅನಿವಾರ್ಯತೆಯ ನಡುವೆಯೂ ಹಗಲಿರುಳು ಶ್ರಮಿಸಿದ್ದೇವೆ. ಈ ನಮ್ಮ ಶ್ರಮವನ್ನು ಕುರಿತಂತೆ ಮೆಚ್ಚುಗೆ ಸೂಚಿಸಿದವರು ಹಲವರು. ನೀವೇ ಯಾಕೆ ಪುಸ್ತಕ ಪ್ರಕಟಿಸಬಾರದು? ಎಂದು ಪ್ರಶ್ನಿಸಿದವರು ಮತ್ತೆ ಕೆಲವರು. ಹಾಗೆ ಹಲವರ, ಕೆಲವರ ಅಭಿಪ್ರಾಯಗಳು ನಮ್ಮಲ್ಲಿ ಘನೀಭವಿಸಿ ಪುಸ್ತಕ ಪ್ರಕಾಶನದ ಕೆಲಸಕ್ಕೆ ಮುಂದಾಗಿದ್ದೇವೆ.